人情味搭夠


一向對 Renee Zellweger有信心，覺得她選擇去演的電影，都有番啲水準。所以有部戲，雖然在北美雅虎，專業影評評價不高，普通觀眾啲評語就甚佳，我都決定入場睇了，New in Town 港譯：緣份初到埗 Trailers & Clips


今次個故事看來的確是平淡啲，講個商界女強人，由大城市邁亞密，調到風雪中的明尼蘇達州，讓她發現重新計量，小鄉鎮和大城市的價值觀。上次看 Renee Zellweger 的電影是 Miss Potter ，雋穎的故事，平淡得來，很有驚喜，今次又睇佢喇。





冇錯，Renee Zellweger 由頭帶到尾，撐起成套戲，其他沒有具名氣的明星，而且戲份不多，只是出出入入的群戲，跟 Renee Zellweger 有幾場對手戲，較多出場的祇是，演她在小鎮工廠 office的秘書 Siobhan Fallon Hogan，和演工會代表的 Harry Connick Jr. 罷了。


故事簡介：
故事沒有驚喜，是舊橋翻拍再翻拍，但橋唔怕舊，只要細節改得有趣，一樣得到觀眾接受。咁就由邁亞密開始罷，一心向上爬的 Lucy Hill （Renee Zellweger），毅然由溫暖的邁亞密，飛到冰天雪地的明尼蘇達州，打理整頓 downsizing 小鎮工廠。


唔使多講，大城市女強人行政經理，一抵步就慘個大鄉里入城，固然跟小鎮工廠的員工格格不入，又不熟識當地法例、民情、俗例、生活習慣，搞出個大頭佛，還炒埋個 foreman工頭。而且 Lucy誤會女秘書的好意，因為女秘書邀請 Lucy到家中晚飯，介紹了個男仔佢認識，Lucy以為是個 setup，取笑她是嫁不出的，原來這位男士是當地工會代表。在外國工會勢力強大，行政人員需要和工會頭頭有計傾，至可以順利 downsizing，進行改革。


不過這小鎮存在，其實就是因為有這間工廠而聚集成，工廠是最大雇主，工廠的存亡關係很多人的生計，居民和工人只要女強人改變態度，萬事都是有得相量，有得傾的。咁樣就漸漸令到女強人改觀，小鎮廠房的員工是善良的，居民很有人情味，他們都是老老實實打工搵生活的好人，熱愛家庭的父母，愛護仔女的好爸爸好媽媽，守望相助的好鄰居好市民。


女強人多次拖延工廠 downsizing，令到工人繼續有工開，卒之被召回邁亞密，總部決定要短期內柵門大吉，咁女強人行政經理，返到去明尼蘇達小鎮，點去同班工人鎮民交代呢？有咩計可以領到總部改變主意呢？


當然故事喺女強人冧到方法喇，佢搵埋工會頭頭，還有之前被炒的foreman工頭，都回來一起，齊心合力，最後戲劇性咁創出新的產品，打響新品牌。總部就派人來到，不但不關門，還擴充廠房，仲請返以前 layoff啲工人，令成個小鎮復興，新產品行銷全國，女強人則調回邁亞密升職。


間廠就愈造愈成功，但女強人返到邁亞密並不快樂，總部還決定把起死回生的明尼蘇達州工廠，高價賣出給新投資者，因為總部決定退出工廠生產業，新的東家想把整間廠搬到攪和暖的州份，咁班工人又要面對失業危機，咁點辦呢？當然是女強人再度發威嘞，究竟點翻盤呢？留返你地入場睇戲罷。


個人評論：
今時今日全球都因受金融大海嘯拖累，有錢賺冇錢賺的企業，都為了盈利而抄人、裁員、瘦身、縮皮，layoff 之聲不絕于耳，本電影指出只要上下齊心，加埋工會合作，不是逢事必反，大家有商有量，是可以共同渡過絕境的，製造雙贏三贏機遇。這個硬道理沒有因時間而改變過，只是人心的自私，各自只顧自己一方利益，最終拉倒散水，沒有一方得益。


再回頭看看前些時美國三大車廠，上層祇顧肥了自己，去華盛頓DC撲水，仲乘坐千萬元的私家Corp Jet飛去，工人工會為了福利不肯妥協，最終是上層決定暫時停產，寧願掉空廠房，工人冇工開，靠吃政府失業救濟，工會少收了會費，並影響下游工業，牽連社區消費都謝哂。電影公司趁今時今日推出電影，真是當頭棒喝，有警世之心，這個 message，有幾多人接收得到呢？


好嘞！就如早前提過，『橋唔怕舊、最緊要受！』只要細節上改動適宜，加啲糖，加啲醋，加啲色水，觀眾睇得開心就得嘞，唔喺一定要依遁攞金像獎條 formula，咁去拍電影，為要攞獎嘅，因為睇電影是為娛樂啫。還有演 Lucy Hill 的 Renee Zellweger，駕輕就熟，一貫的好戲，由頭帶到尾，不用為攞獎而拍，沒有咁沉重，發揮得更放，故事流暢，唯一比較差的是拯救工廠，太過容易，只是小瑕疵，能開開心心渡過 一小時三十七分鐘，就得嘞！就夠嘞！


若只是想悠悠閑閑咁，睇出開開心心嘅戲，訊息正面嘅戲，娛樂一吓，舒展一吓，我誠意推薦！