昂坪360（上）+（下）

昂坪360（上）+（下）

圖片來源：昂坪360

趁放大假打算去試搭重開的 昂坪360 吊車，既然要去，當然賣賣口乖，問問老爸老媽有冇興趣同去。


卒之三人成行，不過由港島東去到東涌，條路都幾遠路，搭港鐵都要要轉幾轉車才抵達，到了東涌站後，先到旁邊東薈城 Citygate 內的茶樓，嘆嘆上午茶都未遲，順便行行商場，原來話喺香港唯一的 Outlet Mall，不過冇時間行嘞，有機會再來。


昂坪360 的車站原來不是和東涌站相連的，也沒有行人天橋直達，指示的標志也不清不楚，唯有路在口邊，一路問一路行，在那處排隊，唉！


在地下排隊處有一大堆鐵欄，但就沒有列出隊尾，去到邊就需要的等候大約時間，給遊客一個心理準備，在沒有資料下，我們唯有跟隊喇，雖然有巴士公司的大嬸兜客，不用等候就可上車，不過嚟得嘅梗喺要搭吊車，顧不作考慮。


由地面一路排，一截一截咁沿著鐵欄咁上，上到去至見到原來前面，打的人龍蛇餅，比在平地上的多成倍，洗濕咗個頭，唯有隨遇而安，安心排隊再等，老爸更發揮他好客本色，與一眾的外國遊客訕搭搭訕，咁又打發咗啲等候 dead air時間。


點知去到購票啲 counters 前啲秩序就大亂了，個個搶住排個有利的 counter， 車站人員點解唔截著人群，由一個員工睇著邊個 counter，替人客辦完購票，就指示下一個組合去 counter 前購票呢？ 秩序當然會好好多。


好嘞辦好購票手續，但老爸老媽一早聲明，冇興趣睇馬騮戲，同唔品茗喝名茶，亦唔看『與佛同行』，咁祇需要賣來回程吊車套票便成。


之後又再要排隊等上車嘞，望望前端，個蛇餅打完又打，老爸再發揮他好客本色，與一眾的外國遊客訕搭搭訕，咁又再打發咗啲等候 dead air 時間。


來到上車處前，車站職員就把乘客分組，因為每個車廂可坐十個人云云，可是個班職員認真思考僵化，前面的一組，有一家四口的香港人兩大兩小，就格硬加上六位肥師奶外賓，我們三人就被編排與四位普通哂士的美國遊客成為一組，在閘口等候上車。


前面個組，一家四口先入，霸住一邊座位，兩個小孩當然站在座位上，後入的六位肥師奶就算點逼，都不能坐下在另一邊座位，啲職員想請一家四口張就一吓，而六位肥師奶又不願分開車坐，咁就擾攘咗分幾鐘，唯有請了我們三人跟一家四口同車，六位肥師奶另坐一車，而本來與我們同組的四位美國遊客就另作編排。由排隊到上到車需時九十分鐘，總算上到吊車嘞。


但在吊車上，啲靚仔邊會坐得定呢？ （續待！）

圖片來源：昂坪360

上回講到：在吊車上，啲靚仔邊會坐得定呢？


吊車一路慢慢向上爬，老爸可能是有些擔心，也受上次吊車墮地新聞的陰影，坐得定定在座位上，我和老媽就環顧四方，欣賞一路上的風景，東涌新市鎮，赤臘角機場，較遠的青山，在轉向站之後可遠眺伶仃洋，我話模糊中見到澳門添。


但兩位小孩子就在狹小的吊車箱，左撲右撲，攪到整個車箱搖晃，最終個老豆都驚起上嚟，才制止兩條馬騮安定下來。不久吊車就再轉向，可以看到天壇大佛了。


落車後才知道在轉向站，是有為車廂內的乘客拍照的，我地兩家人都唔知到，冇一個對著鏡頭，而且要成百元一張，顧乏人問津，睇嚟都是專做外國遊客生意嘞，但啲外國遊客都唔知道被影了相，所以冇生意，睇嚟要在當眼處，多作宣傳了。但好多人就對著個 mon，用自己的相機，翻拍張相，雖然寫明不準拍照，啲職員都懶的阻止。


因為我們不是佛教徒，不需要拜神，只當是名勝景點遊覽，昂坪市集，天壇大佛，寶蓮寺，心經簡林，都行過之後，就去寶蓮寺附設的齋堂吃齋，但一致認為菜油下得太重手，齋菜一般水準，不談也罷。


臨走時沒有錯過遊一遊，價值百萬建築的昂坪公廁，各人普偏滿意清潔程度。


因為六時半就收車，為了避過繁忙時段，我們五時許就去排隊搭吊車下山，點知人人都是咁冧法，結果是排到六時才上到吊車。


今次我們三人，被安排和四位外國遊客，同一吊車，七個成人，安坐車中，老爸經過上回上行，平安無事，沒有再擔心，遂再再發揮他的本領，和外國遊客談足全程，我就利用時間拍下幾張，斜陽中的照片。

圖片來源：昂坪360

以上兩篇本寫于：二零零八年十一月十六日


後記：
匆匆過去三年，昂坪360又再加價嘞，近來又頻頻發生障礙，需要停駛修理，遊客驚險被困在吊車上，好在我們2008年去咗先，好耐都唔會再去嚕。



伸延閱覽：
昂坪360 （維基百科）
東薈城 （維基百科）
天壇大佛 （維基百科）
寶蓮寺 （維基百科）
心經簡林 （維基百科）
昂坪市集 （維基百科）