給一向遁規導舉的一羣 『霎時狂想！』



一向有留意北美影事，早幾個星期，發現有部 ，有突出票房紀錄，睇落個 Trailer 和簡介，有幾怪雞的電影 The Hangover，在蛇竇早已經有老美同事，提出來談論，咁就等到在香港上映時，連我都被吸引入場去看看嘞。


The Hangover 港譯：醉爆伴郎團 七月卅日上映 Trailers & Clips

圖片：alookid.com

Starring：
Justin Bartha 新郎 Doug，Bradley Cooper 教書先生 Phil，Ed Helms 牙醫 Stu，Zach Galifianakis 舅仔 Alan，Heather Graham 脫衣舞娘 牙醫的霧水老婆 BB的嫲媽 Jade，Ken Jeong Mr Chow 裸體中國男子 賭城黑幫大哥。


故事：
本來不打算另外寫返個故事出來，故事其實好簡單，照抄返雅虎電影個簡介便成，不過還是讓我來細說罷。


三個伴郎加埋新郎共四人，本來都是一般打工仔，一向遁規導舉，一次玩大咗。第二朝一覺醒來，在拉斯維加斯的豪華套房內，新郎不在了，三個伴郎，個未來舅仔，醒來得返條底褲，入到廁所，有隻老虎喺度。 個教書先生，模模糊糊，唔知自己姓乜。個牙醫就唔見咗隻牙，仲多咗個BB藏在衣櫃裡面。


打電話畀準新郎哥，點知原來佢個手電，留了在酒店豪華套房內，還有張床唔見了個床褥。連個主角都失蹤埋，點算呢？


咁就唯有案情重組，企圖 resolve the mystery 嘞。 首先落到去攞車，由未來外父借出的『平治』跑車，竟然變了部警車，哎唷！偷警車呢回大罪嚕。


好嘞，偷警車咪當然先去警察局，企圖攪返豎先喇，究竟點攪得豎呢？留返你入場睇睇嘞！


好嘞！到搵返架『平治』跑車，就在車尾箱，跳出個全裸的中國男子，見人就打，並要追返欠佢嘅幾萬呅籌碼，去邊度搵返幾萬呅出來呢？


唔顧得咁多著，拖著咁先，不過卒之搵返個BB嫲媽，原來牙醫和脫衣舞娘結咗婚，所以交低個BB畀新老豆照顧，嫲媽要返工，夠未？牙醫有個好管得好嚴厲的未婚妻，點去交代呢？


點知話口未完，拳王泰臣又派人來，捉著了三人，原來隻老虎，喺拳王泰臣嘅寵物，若佢地安全送返隻老虎回家，可以既往不究，咁又有乜計呢？


但依然沒有準新郎的蹤影，而準新娘就成日打電話來，要和準新郎說話，牙醫個未婚妻又頻頻 check 著，教書先生唯有暫時帶領著其他二人，繼續破解一個個謎，究竟前一晚佢，地做咗幾多嘢呢？


就在此時，果個中國人和佢的黨人出現話：『若要救回新郎阿 Doug，就賠返幾萬呅籌碼出來，他們就會放人。』而距離婚禮的時間越來越近，三個人點去搵幾萬呅呢？點去救返新郎阿 Doug 呢？


於是個舅仔突然變得英明神武，變成『賭神』再世，竟然畀佢入賭場贏返有突，咁就去換人啦，點知糊里糊涂，錢就畀咗中國黑幫大哥，而救返來果個阿 Doug，原來是另有其人，是同名的另外一個阿 Doug，但不是新郎阿 Doug，死未？


臨到依家，個舅仔至爆出來，原來第一晚飲啲酒，裡面是加足料的，所以四個人都 HIGH 哂！最後點樣收科呢？要救返新郎阿 Doug，要攪返掂外父部『平治』跑車，牙醫點去和未婚妻交代，又準時送新郎去婚禮會場，同埋四人穿戴妥當，不為新娘發覺呢？



我見：
The Hangover 醉爆伴郎團，是拍給一羣平時沒有“浦”慣的小男人，給他們的一個『狂想』，又不用親身犯險，過癮一吓嘅電影。


在蛇竇討論，對個班『浦精』，不論男女，個個週末，都是玩埋這些，拍丸仔，飲大咗，亂哂籠，神智不清，男女性關係隨便的活動，他們親身經歷過，部電影講的都是濕濕碎。


相信有不少出位的，露骨的，裸露的鏡頭，都已經被電檢署剪掉，否則過不了關。 就正如標題所指，是給遁規導舉的一羣，霎時狂想！得啖笑！輕輕鬆鬆溜走個多小時的 Idle Time，可以選擇此片。


不過帶埋老婆女友入場，就 not recommended， 送幾張戲票，讓她們和姊妹們去睇罷，大家分開睇，大家都可以笑得放啲，因為啲笑位顯然男女不同。